Աննա Հակոբյանը մոտ կես միլիոն վարկ է վերցրել «Յունիբանկ»-ից․ Փաշինյանի ընտանիքի ունեցվածքը

Վարչապետի պաշտոնակատար Նիկոլ Փաշինյանը և նրա ընտանիքը Կոռուպցիայի կանխարգելման հանձնաժողով է ներկայացրել 2020թ- ի հայտարարագիրը։

Փաշինյանը հայտարարագրել է 4 550 000 դրամ ավանդ, որը տարեվերջին նվազել է՝ կազմելով 2 550 000 դրամ։

Նրա բանկային հաշիվներին տարեսկզբին եղել է 3 333 423 դրամ,

319 դոլար, իսկ տարեվերջին այդ գումարները նվազել են՝ կազմելով 1 064 313 դրամ, 56 դոլար։

Որպես կանխիկ գումար Փաշինյանը հայտարարագրել է 790 000 դրամ և 1 800 դոլար։ Վարչապետի պաշտոնում նա ստացել է 12 433 990 դրամ աշխատավարձ։

Փաշինյանի կինը՝ Աննա Հակոբյանը, հայտարարագրել է 2 բնակարան Շենգավիթ վարչական շրջանում։ Բնակարաններից մեկը գնել է, իսկ մյուսը ժառանգություն է ստացել։

Հակոբյանը հայտարարագրել է 3 մեքենա՝ «RENAULT», «NISSAN» և «VAZ» մակնիշի, որոնք ձեռք է բերել, համապատասխանաբար, 2009թ, 2010թ և 2009թ-ին։

Հակոբյանը, որպես բաժնային արժեթուղթ, հայտարարագրել է 50 տոկոս բաժնեմաս, սակայն նշված չէ, թե որ ընկերությունում։

Նրա բանկային հաշվին տարեսկզբին եղել է 904 863 դրամ, որը տարվա ընթացքում նվազել է՝ կազմելով 145 435 դրամ։ Որպես կանխիկ դրամ նա հայտարարագրել է 1000 դոլար։

Որպես եկամուտ նա հայտարարագրել է 1 974 923 դրամ աշխատավարձ, որը ստացել է «Մեր Տպարանը ՍՊԸ»-ից։ Եվս 4011000 դրամ աշխատավարձ ստացել է «Դարեսկիզբ ՍՊԸ»-ից։ Նույն ընկերությունից 540 000 դրամ էլ ստացել է որպես վարձակալություն։ Հակոբյանը «Յունիբանկ ԲԲԸ»-ից 499000 դրամ փոխառություն է ստացել (վարկ)։

Փաշինյանի որդին՝ Աշոտ Փաշինյանը, միայն աշխատավարձ է հայտարարագրել․ 408320 դրամ, որը ստացել է «Մինիսո ԷՅ ԷՄ ՍՊԸ»-ից։

Փաշինյանի ավագ դստեր՝ Մարիամ Փաշինյանի բանկային հաշվին հաշվետու տարվա սկզբին եղել է 324267 դրամ, իսկ տարվա վերջին՝ 438482 դրամ։

Մարիամ Փաշինյանը 2020թ- ի ընթացքում 5 134 548 դրամ աշխատավարձ է ստացել «Դարեսկիզբ ՍՊԸ»-ից։

Փաշինյանի մյուս երկու անչափահաս դուստրերի անունով նոր հայտարարագիր չի ներկայացվել։