Շողակաթ համայնքում երաշտի հետևանքով կորսված է մոտ 80 տոննա հացահատիկ, 600 տոննա անասնակեր

Jun 30, 2021
1 min read

Գեղարքունիքի մարզի Շողակաթ խոշորացված համայնքում տեւական երաշտի հետևանքով այս տարի արդեն տնտեսությունները կորցրել են շուրջ 80 տոննա հացահատիկի բերք, 600 տոննա անասնակեր։

Ինչպես տեղեկացնում է Շողակաթ համայնքի ղեկավար Սուլիկո Շուշանյանը, համայնքի տարածքում ցանված ցորենի եւ գարու արտերը, որոնք կազմել են 40 հեկտար, երաշտի հետևանքով բնական աճ ու զարգացում չեն ապահովել, չեն հասցրել նույնիսկ հասկակալել, ուստի և ենթական չեն հնձման։ Բավարար աճ չեն ապահովել նաեւ ինչպես ցանովի, այնպես էլ բնական խոտհարքերը, որոնք կազմում են մոտ 300 հեկտար։

«Գյուղացիական տնտեսությունների համար շատ ծանր տարի է սպասվում։ Եթե նախկին տարիների պես հացահատիկի արտերն ապահովեին միջինը 2 տոննա բերք, ապա կունենայինք մոտ 80 տոննա հացահատկի բերք, իսկ խոտհարքերից ակնկալում էինք մինչեւ 600 տոննա անասնակեր»,- ներկայացրեց համայնքի ղեկավարը։