Սյունիքի դեպքերից հետո Փաշինյանը մտադիր է փոխել իրավապահ կառույցների ղեկավարներին. «Հրապարակ»

«Սյունիքի դեպքերից հետո Նիկոլ Փաշինյանը դժգոհություններ է հայտնել գլխավոր դատախազ Արթուր Դավթյանից և Քննչական կոմիտեի նախագահ Հայկ Գրիգորյանից։

Ասում են՝ մտածում է նրանց փոխելու մասին, քանի որ, Փաշինյանի կարծիքով՝ իրավապահ կառույցներն ամեն ինչ պետք է անեին, որ դատարանները կալանքի սանկցիաներ տային ձերբակալվածներին։

Խոսքը նրանց մասին է, ովքեր իրեն սյունյաց «ողջույններ» էին հղել։

Երեկ մեր լրագրողը դատախազ Արթուր Դավթյանից հետաքրքրվել է՝ Նիկոլ Փաշինյանը դժգո՞հ է իրենից՝ այդ գործերի կապակցությամբ, և քննարկումներ կա՞ն իրեն փոխարինելու հարցով։

«Ինձ նման բան հայտնի չէ, եթե ձեզ հայտնի է՝ քննարկեք, ով որ քննարկում է, ինձ նման բաները չեն հետաքրքրում»,- նյարդային պատասխան է տվել Դավթյանը, սակայն անակնկալի չի եկել հարցադրումից։ Այսինքն՝ վարչապետը գոհ է Ձեզնից։

«Ես չեմ հարցրել իրեն, որովհետև դա էական չէ»: Ինչ վերաբերում է Սյունիքի դեպքերին, ասել է, որ ինքն էլ է դժգոհ դատարանների որոշումներից և որոշ գործերով բողոքարկելու է դրանք»,-գրում է թերթը