Տեղահանվածների վերադարձը՝ հետպատերազմյան Արցախի հրատապ խնդիր. ի՞նչ ծրագրեր են գործում

Ռազմական գործողությունների դադարից յոթ ամիս անց էլ Արցախում հրատապ հարցերի թվում է տեղահանված արցախցիների վերադարձը:

ԱՀ տարածքային կառավարման և ենթակառուցվածքների նախարարության հասարակայնության հետ կապերի բաժինը Mediahub-ին տրամադրել է տվյալներ բնակեցման գործընթացի վերաբերյալ:

Ըստ այդմ՝ 2021 թվականի հունիսի 15-ի դրությամբ պետության կողմից բնակարանների և բնակելի տների վարձավճարի փոխհատուցման ծրագրի շրջանակներում 2278 ընտանիք ստացել է աջակցություն: Քաղաքացիները բնակարանները վարձակալել են Արցախի բոլոր շրջաններում: Նշենք, որ ծրագիրը գործում է անորոշ ժամկետով:

Ըստ առաջնահերթության՝ երկրորդ ծրագրով մոտ 1600 տեղահանված քաղաքացի բնակեցվել է Ստեփանակերտի և շրջանների հյուրանոցներում ու հյուրատներում: Այս պահին քաղաքացիներին բնակեցնելու գործընթացը ժամանակավորապես դադարեցված է, քանի որ հյուրանոցներում ազատ սենյակներ չկան։ Ազատ համարներ լինելու դեպքում բնակեցվում են նախապես գրանցված քաղաքացիները։

Պետության հոգածությամբ ստեղծվում է կենցաղի ու զբաղվածության պայամններ, որպեսզի տեղահանված արցախցիների՝ առանց այն էլ ծանր հոգեվիճակի պայմաններում հնարավոր լինի արագ ինտեգրվել հասարակությանը:

Տարածքային կառավարման և ենթակառուցվածքների նախարարությունն այժմ տվյալների հավագրման և կարիքների գնահատման փուլում է:

Հեղինակ՝ Անի Մարտիրոսյան