Աստված չանի՝ Փաշինյանից գործակցության առաջարկ ստանանք․ Վահե Հակոբյան

«Հայաստան» դաշինքի պատգամավորի թեկնածու Վահե Հակոբյանի խորին համոզմամբ՝ «Քաղաքացիական պայմանագիր» կուսակցությունը երեսուն տոկոսից ավելի ձայն չի հավաքել։ Այս մասին այսօր գլխավոր դատախազության մոտ ի աջակցություն Արմեն Չարչյանի անցկացվող ակցիայի ժամանակ ասաց նա։

Վահե Հակոբյանը նշեց, որ ապատեղեկատվություն է, թե, իբր, խորհրդարան գնալու են ՀՅԴ և «Վերածնվող Հայաստան» կուսակցությունները, իսկ Ռոբերտ Քոչարյանի թևը հրաժարվելու է մանդատներից։

«Մենք մի ուժ ենք, և որոշումը լինելու է միասնական»,- ասաց նա։

Դիտարկմանը, որ Նիկոլ Փաշինյանը քաղաքական տարբեր ուժերի համագործակցության առաջարկ է արել, արդյո՞ք նման առաջարկ չի եղել «Հայաստան» դաշինքին, Վահե Հակոբյանն արձագանքեց․ «Աստված չանի՝ նման առաջարկ ստանանք»։

Ըստ Հակոբյանի՝ քաղաքական անբարոյականություն է, երբ քաղաքական ուժերը գնում և հանդիպում են Նիկոլ Փաշինյանին։