Սա ազգային խայտառակություն է, վիրավորանք մեր՝ որպես ազգ և պետության նկատմամբ․ Վարդան Ոսկանյան

«Պատիվ ունեմ» դաշինքի անդամ Վարդան Ոսկանյանը ֆեյսբուքյան իր էջում գրում է․

«Հայաստանի Հանրապետության ինքնիշխան տարածքն արդեն մեկ ամսից ավելի մի քանի հատվածներում բռնազավթված է թշնամու կողմից։

Հենց այս թշնամական բռնազավթման «ֆոնին» է, որ կապիտուլյանտը մուրճ է թափ տալիս հայաստանյան հասարակության վրա՝ զառանցելով «նոր հեղափոխությունների», «մեխելու», «ատամները ջարդուփշուր անելու», «պողպատե մանդատ ստանալու» և այլ, մեղմ ասած, անհավասարակշիռ գործողությունների վերաբերյալ։

Պատկերացնո՞ւմ եք՝ արտաքին աշխարհում ի՞նչ են մտածում Հայաստանի մասին՝ որպես ազգ և պետություն, թշնամական մասնակի բռնազավթման պայմաններում վարչապետի պաշտոնակատարի աթոռը դեռևս զբաղեցնողի այսպիսի վարքագիծը տեսնելով։

Ամեն ինչից զատ, սա ազգային խայտառակություն է, վիրավորանք մեր՝ որպես ազգ և պետություն, արժանապատվության նկատմամբ, երբ հազարամյակների պատմություն ունեցող մշակութաստեղծ մի ազգի փորձում է «առաջնորդել» նման մի խեղկատակ»։