Ազգային հերոս Կոմանդոսը այսօր կդառնար 82 տարեկան

ՀՀ ազգային հերոս, գեներալ-մայոր Արկադի Տեր-Թադևոսյանը՝ Կոմանդոսը, այսօր կդառնար 82 տարեկան:

Արկադի Տեր-Թադևոսյանը ծնվել է 1939 թվականի մայիսի 22-ին Թբիլիսիում։

Նա ավարտել է Բաքվի զինվորական ուսումնարանը, հետո՝ Լենինգրադի տրանսպորտի և թիկունքի ռազմական ակադեմիան։

Արկադի Տեր-Թադևոսյանը ունեցել է հարուստ ռազմական փորձ։ Նա Խորհրդային տարիներին ծառայել է Աֆղանստանում, Գերմանիայում, Չեխոսլովակիայում, Բելառուսում։

Արցախյան շարժման մեկնարկին նա մեծ գործունեություն է ծավալել։ 1988 թվականից սկսած միացել է շարժմանը և ակտիվ մասնակցել է կամավորականների զինվորական մարզման գործում։

1990 թվականին դարձել է «Սասունցի Դավիթ» կամավորական ջոկատի անդամ։

1991 թվականին նշանակվել է Հայաստանի պաշտպանության կոմիտեի արտազինվորական պատրաստության բաժնի պետ։

1991 թվականի հոկտեմբերի 30-ին Արցախի նորաստեղծ ինքնապաշտպանական ուժերը Տեր-Թադևոսյանի հրամանատարությամբ իրականացված ռազմագործողության շնորհիվ ազատագրեցին ռազմավարական մեծ կարևորություն ունեցող Հադրութի շրջանի Տող գյուղը։

1992 թվականի մայիսին ակտիվ մասնակցություն է ունեցել Շուշի քաղաքի ազատագրման ռազմագործողության նախապատրաստման աշխատանքներին։

Արկադի Տեր-Թադևոսյանը մահացել է այս տարի մարտի 31-ին։