Իսրայելում հայերի շրջանում զոհեր չկան․ «Sputnik Armenia»
- May 12, 2021
- 1 min read
Իսրայելն ապրում է սովորական ռեժիմով՝ չնայած Գազայի հատվածի հետ սահմանին տիրող լարված իրավիճակին։
Իսրայելի Լոդ քաղաքում հրթիռակոծության հետևանքով տուժածների և զոհերի թվում հայեր չկան: Տեղեկությունը Sputnik Արմենիային հայտնեց Երուսաղեմի Հայոց պատրիարքարանի ներկայացուցիչ Տիրան Հակոբյանը։
Ավելի վաղ հայտնի էր դարձել, որ հրթիռային հարձակման հետևանքով Լոդում մարդիկ են մահացել, զոհերի թվում նաև երեխա կա:
Նրա խոսքով՝ ընդհանուր առմամբ երկրում կյանքն ընթանում է սովորական ռեժիմով, մարդիկ նաև աշխատանքի են գնում, այդ պատճառով ռազմական կամ արտակարգ դրություն չի մտցվել: Ըստ Հակոբյանի` Իսրայելում կարծում են, որ հատկապես լարված կլինի այսօր երեկոյան, քանի որ մայիսի 12-ը ռամադանի վերջին օրն է (մահմեդականների համար պարտադիր պահքի ամիս):
ՀՀ ԱԳՆ-ից Sputnik Armenia-ին այտնեցին, որ մշտական կապի մեջ են Երուսաղեմի Հայոց պատրիարքարանի, ինչպես նաև հայկական համայնքային կառույցների հետ: «Այս պահի դրությամբ հայերի շրջանում տուժածներ չկան, համայնքային կյանքն ընթանում է բնականոն հունով»,– հաստատեցին գերատեսչությունից:
Ավելի վաղ ՀԱՄԱՍ շարժման «Ալ Քասամ» բրիգադի մարտական թևը հարյուրավոր հրթիռներ էր արձակել Իսրայելի ուղղությամբ: Շարժման ներկայացուցիչներն ընդգծել էին, որ գնդակոծությունների ակտիվացումը կապված է Պաղեստինի բնակելի շենքերին ուղղված հարվածների հետ:
Comentarios